#စရိုက်မတူတဲ့လူ
အာစီတူးမှာကျောင်းစတက်တုန်းကကျောင်းဖွင့်ချိန်မှာဘဲဝါသနာတူတွေစုဖွဲ့မိကြပါတယ်..
ကျနော်က..ကမာရွတ်ဆင်ရေတွင်းမှာနေတယ်..ရှမ်းလေးကလှိုင်မှာနေတယ်..
ရှမ်းလေးအိမ်မှာကျနော်တို့တီးဝိုင်းလုပ်ကြတယ်...
ဖရက်ရှာဝဲလ်ကမ်း..မလုပ်ခင်..ရှမ်းလေးအိမ်မှာသီချင်းတိုက်ကြတယ်...
ဝါသနာရှင်တွေအများကြီးလာကြတယ်..ဂစ်တာတီးတဲ့ဝါသနာရှင်တွေလဲအများကြီး...
ကျနော်လဲ..ရစ်သမ်တီးတယ်..ဝိုင်းကူတဲ့သဘောပါ...
လာကြတဲ့ဝါသနာရှင်တွေထဲကကောင်မလေးတစ်ယောက်ထူးခြားနေတယ်..
မြန်မာဆန်ဆန်အင်္ကျီဝတ်ထားတယ်..သူ့နာမည်က’မခင်နှင်းဆီ’
သူ့ကြည့်ရတာမြန်မာသီချင်း..ဆိုလိုတာကမြန်မာ့အသံကမိုနိုသီချင်းဆိုမယ်ထင်တာဘဲ..
“ဟြောင့်...မင်းနဲ့ငါနဲ့..အရင်သီချင်းတိုက်ရအောင်..”
ကျနော့်ကိုဘယ်သူခေါ်တာလဲလို့မော့ကြည့်မိတာ..’မခင်နှင်းဆီ’
စိတ်ထဲမှာတမျိုးကြီးဘဲ..ဆိုလိုတာက..သူ့ဒီဇိုင်းနဲ့သူ့ပြောသံနဲ့မလိုက်ဖက်တာ..
“မင်းဘာသီချင်းဆိုမလို့လဲ..”
...”ငါပြောမယ်..မင်းတီးပေးပါ..”
...”မဟာရန်ကုန်..ဟုန်..မြို့ရဲ့..လမ်းမကြီးတစ်ခုမှာ...”
..”လူတွေ..လူတွေ..ရှုပ်ထွေး..အများကြီးရှိလို့နေ..”
..”အမှတ်တမဲ့နဲ့တွေ့ရှိ..ရီးစားဟောင်းလေးကို..”
..”ပွမ်ပွမ်..မြည်တဲ့ကားထဲ..အတွဲလေးအသစ်နဲ့လေ..”
..”ဟြောင့်..ငါဆိုတာ..အဆင်ပြေလား..”
“ကောင်းပါတယ်...နောက်သီချင်းရှိသေးလား..”
..”ရှိတာပေါ့..မင်းတီးပေးအုန်း..”
..”ဦးဘညွန့်ရဲ့ချစ်ဒုက္ခကို..သိလား..”
..”ခုဘဲချစ်လိုက်..ခုဘဲမုန်းလိုက်..အဲဒါတွေကိုမလိုဘူး..ဟေ့..”
ဒီကောင်မလေး..လူနဲ့သီချင်းနဲ့သူ့နာမည်နဲ့..တခုမှမလိုက်ဖက်..
“မင်း..ဘယ်ဒီဇိုင်းနဲ့တက်ဆိုမလဲ..ဂျင်းဘောင်းဘီနဲ့ဂျင်းအင်္ကျီနဲ့ဆိုမိုက်မှာ..”
...”နိုး..နိုး..ငါက..မင်းသမီး..ထိုင်မသိမ်းအင်္ကျီနဲ့တက်ဆိုချင်တာ..”
ဗုဓ္ဒေါ...မြတ်စွာဘုရား...သောက်တလွဲ...
...”ဟေ့..မောင်ဂျစ်..မင်းကောင်မလေးက..ဘောပြားထင်တယ်..”
“ငါ့ကောင်မလေးမပြောပါနဲ့..”
“ကြည့်ရတာမင်းတို့ပြောတဲ့ဘောပြားလို့ထင်တာဘဲ..”
ဒီလိုနဲ့သီချင်းတိုက်ကြရင်းခင်လာကြပါတယ်...
ကျနော်တို့နှစ်ယောက်အတူတူသီချင်းတိုက်တာများတယ်
ဂီတအကြောင်း..ကျောင်းတက်နေတဲ့အကြောင်း..သူ့အကြောင်းကိုပြောပြတယ်
သုမင်္ဂလာလမ်းမှာခြံနဲ့နေတယ်..မိဘတွေချမ်းသာတဲ့ပုံဘဲ
..”ဟိုကောင်..မောင်ဂျစ်..မင်း...ဘောပြားအကိုင်ခံရတော့မယ်..”
“ဘာလဲ..ငါကရိုးရိုးသားသားပါ..”
ကျနော်တို့ခင်လာကြတာ..ဒုတိယနှစ်ရောက်လာပြီ...
...”ဟြောင့်တွေ..ငါတို့မိန်းထဲသွားရအောင်..”
“ဘာလုပ်မလို့လဲ..မိန်းကငါတို့နဲ့ဝေးတယ်..မအပ်စပ်ဘူး..”
..”လိုက်ခဲ့ကြပါကွာ..ငါ Fan Fair သွားချင်လို့ပါ..”မခင်နှင်းဆီအတင်းခေါ်နေတယ်
ဒီလိုနဲ့သူငယ်ချင်းတွေစုပြီးမိန်းထဲကိုချီတက်လာကြပါတယ်..
စီးပွါးရေးတက္ကသိုလ်နဲ့ဘွဲ့နှင်းသဘင်ကြားမှာ Fan Fair တခုလုပ်နေတယ်
ဂိမ်းတွေလဲအများကြီး၊ကျောင်းသားတွေလဲအများကြီး၊ဆော့နေလိုက်ကြတာ...
“ဟာ...ဟိုမှာ..ဟိုမှာ..ခြားရဟတ်ကြီး..သွားစီးရအောင်..”မခင်နှင်းဆီအော်ပြောနေတယ်..
သူပြောတာအရေးမကြီးဘူး..ကျနော့်လက်ကိုဆွဲပြီးပြေးတာ...
ကျနော့်မှာယက်ကန်ယက်ကန်နဲ့...
“ဟေ့ကောင်..မဖြစ်ဘူး..ငါမစီးဘူး..နင်စီးချင်စီး”
ကျနော့်အကြောင်းကျနော်သိတယ်..လုံးဝငြင်းတယ်..
ဘာကြောင့်ဆိုတော့..ကျနော့်မှာအမြင့်ကြောက်တဲ့ရောဂါရှိတယ်...
..”မင်းကလဲ..ယောကျ်ားဖြစ်ပြီး..ဘာဖြစ်နေတာလဲ”
ကျနော်မလိုက်တော့....နောက်တစ်ယောက်ခေါ်ပြီးစီးတယ်..
တစ်ခေါက်လဲမဆင်း..နှစ်ခေါက်လဲမပြီး...သုံးခေါက်လဲမလာ..
အဖေါ်လိုက်တဲ့ကောင်တွေတစ်ကောင်ပြီးတစ်ကောင်ဆင်းလိုက်တက်လိုက်
မခင်နှင်းဆီ..မပါ...
ခြားရဟတ်ပေါ်မှာ..တဟေးဟေးနဲ့ပျော်နေတဲ့ပုံကခလေးတစ်ယောက်လိုဘဲ
အာစီတူးကကဲင်တင်းတွေမှာ..သီချင်းတွေဆိုတဲ့..ရှမ်းလေးအိမ်မှာ..
မခင်နှင်းဆီနဲ့ကျနော်..တော်တော်လေးအပေးအယူတည့်တယ်...
သူငယ်ချင်းတွေ..ကျနော်တို့ကို..အမြဲစကြတယ်...
မောင်ဂျစ်နဲ့ဘောပြား...ဘောပြားနဲ့မောင်ဂျစ်...
မခင်နှင်းဆီလဲသူငယ်ချင်းတွေစနေတာ..သိနေတယ်..သူ..အေးအေးဆေးဆေးဘဲ
တစ်ရက်..ကျနော်ဆီဖုံးဆက်ပြီးခေါ်တယ်..အဲ့ဒီအချိန်ကျောင်းတွေပိတ်နေတယ်..
သူ့ကိုမြောက်ဥက္ကလာလိုက်ပို့ပေးဖို့..အချိန်ကြည့်လိုက်တာ ၇ နာရီရှိနေပြီ..
ကျနော်ပါပလစ်ကာနဲ့မခင်နှင်းဆီကိုသင်္ကန်းကျွန်းမှာသွားခေါ်ပြီးမြောက်ဥက္ကလာဆက်သွားတယ်..
မြောက်ဥက္ကလာ၊မယ်လမုဘုရားရှေ့မှာဘုရားပွဲရှိလို့လမ်းတွေပိတ်နေတယ်...
“မင်းကား..ဘုရားထဲဝင်ရပ်လိုက်လေ....”
...”နင်ဘယ်သွားမလို့လဲ..”
“ငါ..မယ်လမုဘုရားလာတာ..”
“စောထဲကပြောရော..”
“ဆင်းကွာ...ကြာတယ်..”
“ဘာလုပ်မလို့လဲ...”
..”ငါ..ခြားရဟတ်..စီးချင်နေတယ်”
“နင့်ဘာသာစီးချင်စီး...ငါမစီးဘူး..”
“..မင်းစီးကြည့်စမ်းပါ..မစီးရသေးဘဲနဲ့မပြောနဲ့..ရင်ထဲတလှပ်လှပ်နဲ့ခံစားလို့ကောင်းလိုက်တာ”
“..အဲဒီအရသာ..မောင်ဂျစ်ကိုခံစားစေချင်တာ...”
..”ငါခံစားလို့မရဘူး..”
မခင်နှင်းဆီ..တစ်ယောက်ထဲသွားပြီ..ကျနော့်ကခြားရဟတ်အောက်မှာငုတ်တုတ်ထိုင်စောင့်
တစ်ပတ်ပြီးတစ်ပတ်လှည့်ပြီးသွားတယ်..ဘေးကလူတွေတစ်ယောက်ပြီးတစ်ယောက်ပြောင်းသွားတယ်
မခင်နှင်းဆီမဆင်းလာသေးပါ...ကျနော်သူ့ကိုနားမလည်တော့ပါ...
အပြန်သူ့ကိုလိုက်ပို့တဲ့အချိန် ဆယ်နာရီထိုးတော့မယ်...
“ငါ့နဲ့ထွက်သွားတာ..နင့်အိမ်ကစိတ်မပူဘူးလား..”
..”နင့်နဲ့ဆို..ပိုလို့တောင်စိတ်ချသေးတယ်..”
..”နင့်ကိုအားနာလို့..ငါပြန်ဆင်းလာတာ..မဆင်းချင်သေးဘူး..”
..”ငါက..ရင်တလှပ်လှပ်နဲ့ခံစားလို့တောင်မဝသေးဘူး..”
“ဝေဟင်မှာလေဟုန်စီး..ယီးလေးလေးခိုကာရယ်..”
“မောင့်ဆီကိုမနားတမ်း..ဝဲပျံချင်တယ်..”
“ချစ်ခွန်းတွေဖွဲ့ကာနွဲ့ကာ..သူ့ကိုနွဲ့ဆိုး..ဆိုးလိုက်ချင်တယ်..”
ကားပေါ်မှာ..မာမာအေးသီချင်း”မိုးယံမှသည်ချစ်သူဆီ”သီချင်းကို...
တအေးအေးနဲ့ဆိုနေတယ်၊သူငယ်ချင်းတွေစနေကြတာလဲ..သူသိနေတယ်..
သိနေတဲ့ကြားထဲက..ကျနော့်ကိုဟိုပို့ခိုင်း၊ဒီပို့ခိုင်း..အမြဲလုပ်တယ်..
ကျနော်လဲ..မခင်နှင်းဆီ..သွားချင်တဲ့နေရာတွေလိုက်ပို့ဖြစ်တယ်...
သူသီချင်းတွေဆိုနေရင်..သူဘယ်လောက်ဆိုဆို..ကျနော်ဂစ်တာတီးပေးချင်တယ်..
ဒါပေမဲ့..ခြားရဟတ်ပေါ်တက်ပြီးရင်..မဆင်းနိုင်တော့တဲ့သူ့ကိုစိတ်ကုန်လာတယ်
ဟိုနေ့တုန်းကလဲ..ဖုန်းဆက်ခေါ်ပြီးရေကျော်ပွဲဈေးလိုက်ပို့ခိုင်းတယ်..
ကျနော်သိတယ်..သူခြားရဟတ်စီးချင်နေပြီ...
တစ်နာရီကြာစီးပြီးမှပြန်ဆင်းလာတယ်...
သူကပြောရှာတယ်..ငါကြုံလို့ရဟတ်စီးတာပါတဲ့..
ရန်ကုန်တမြို့လုံးမှာရှိတဲ့ပွဲဈေးကခြားရဟတ်တွေကိုမတွေ့..တွေ့အောင်ရှာပြီးလိုက်စီးတယ်..
ကြာတော့ခြားရဟတ်လှည့်တဲ့ဝန်ထမ်းကောင်လေးတွေတောင်သူ့ကိုမှတ်မိနေကြပြီ..
ဒီလိုနဲ့..တတိယနှစ်မိန်းထဲရောက်လာပြီ..
ကျနော်ကမန္တလေးဆောင်..ဘူမိဗေဒမှာတက်နေပြီ..
မခင်နှင်းဆီ..သိပ္ပံခမ်းမဖက်ကရူပဗေဒမှာတက်နေတယ်...
သူနဲ့ကျနော်..ရန်ကုန်တက္ကသိုလ်ဝင်းထဲမှာဘဲ...နဲနဲတော့ဝေးသွားပြီ..အသွားအလာကျဲသွားပြီ...
ဝေးတာတော့မဟုတ်..လာချင်ရင်အနီးလေးပါ...
သူနဲ့ကျနော်..ချစ်သူလို့တော့ပြောမရသေးပါ..ကျနော်သူ့ကိုဘာမှမပြောရသေးပါ..
ခင်မင်ခဲ့တဲ့သူငယ်ချင်းတစ်ယောက်ထက်မပိုခဲ့ပါ
အခြေအနေတွေက..ဒီထက်ပိုချင်ရင်လဲ..အခြေအနေတွေပေးနေတယ်...
ဒီလိုနဲ့..Fan Fair တခုကခြားရဟတ်ပေါ်မှာ မခင်နှင်းဆီကိုလက်ချင်းတွဲပြီး
ပြုံးပျော်ရွှင်နေတဲ့..ကောင်လေးတစ်ယောက်နဲ့အတူတူတွေ့လိုက်တယ်..
“ဟိုမှာ..မောင်ဂျစ်..မင်းဘောပြား..ဘဲအသစ်တပွေနဲ့..”
“ငါတို့ဒီကောင်လေးနဲ့တွဲနေတာမြင်တာကြာပြီကွ”
ကောင်းပါတယ်..အမြင့်ကြိုက်တဲ့သူ၊စရိုက်တူတဲ့သူအချင်းချင်းကြိုက်ကြတာဘဲကောင်းပါတယ်
ကျနော်..အမြင့်ကြောက်တယ်...
//////////////////////////////////////////
ကျနော်တို့ခေတ်တွေတုန်းကဂျပန်ထွက်ပြီးအလုပ်လုပ်ကြတာများတယ်..
သင်ခဲ့တဲ့ကျောင်းစာတွေနဲ့လုပ်နေတဲ့အလုပ်တွေကတခြားစီ..
လုပ်ခတွေကမက်စရာဆိုတော့သွားရတာပေါ့..
ကျောင်းဗီဇာနဲ့ထွက်ပြီး..ကျောင်းတက်...ဂျပန်စာသင်ရင်းနဲ့အလုပ်ရှာကြ..
အရင်ရောက်နှင့်တဲ့လူတွေကလမ်းညွန်ပေးလေ့ရှိတယ်..
လုပ်ရတာတွေကအမျိုးစုံပါဘဲ...အများအားဖြင့်စားသောက်ဆိုင်တွေမှာလုပ်ကြပါတယ်..
ကျနော်လဲစားသောက်ဆိုင်တစ်ဆိုင်မှာလုပ်တယ်...
သိကြတဲ့အတိုင်းအလုပ်သမားအများစုကကျနော်တို့ရွှေနိုင်ငံက...
ကျနော့်ကျောင်းနေဖက်တွေ၊အာစီတူးကသူငယ်ချင်းတွေ၊ဘူမိဗေဒကသူငယ်ချင်းတွေလဲရှိတယ်
ပင်ပမ်းပေမဲ့လဲ..သူငယ်ချင်းတွေနဲ့ဆိုတော့လုပ်ရတာပျော်စရာကြီး...
ကျနော်တို့အလုပ်မှာ..မန်နေဂျာလို့ခေါ်တဲ့ဂျာကြီးတစ်ယောက်ရှိတယ်..
သူ့အောက်မှာ..စူပါလို့ခေါ်တဲ့လက်ထောက်လေးယောက်ရှိတယ်..
စူပါအောက်မှာကျနော်တို့ ၁၅ ယောက်လုပ်ရတယ်..
စူပါတွေက..အသားတွေလဲလှီးတယ်...အကြော်ဆရာလဲလုပ်တယ်..
ကျနော်တို့လုပ်တာတွေကိုလဲစောင့်ကြည့်တယ်..
ကျနော်တို့ဆိုင်ရဲ့ချစ်စရာဓလေ့တခုကတလမှာတစ်ရက်နားရက်မှာ
အပမ်းဖြေစရာ..လည်ပတ်လို့ရတဲ့နေရာတွေလိုက်ပို့ပေးတယ်..
“မင်းတို့..လျှောက်လည်တဲ့အခါ..ဟိုစူပါလံဘားနဲ့ဆုံရင်....နာပြီ”
“ဘာဖြစ်လို့လဲ..”
“ဒီလံဘားက..မင်းတို့တွေရဲ့အားနည်းချက်တွေလိုက်နားထောင်ပြီးနောက်တတ်တယ်”
“ငါတို့အဖွဲ့..ပါးစပ်လုံပါစေ..”
“ပြီးခဲ့တဲ့လလျှောက်လည်ကြတုန်းကရေမကူးတတ်လို့ရေကြောက်တဲ့ကောင်ကို
ရေကန်ထဲတွန်းချခဲ့တယ်”
“တိရစ္ဆာန်ရုံသွားတုန်းကလဲမြွေကြောက်တဲ့ကောင်ကိုမြွေဝါတစ်ကောင်လည်ပင်းမှာ
ပတ်ပေးပြီး..တဟားဟားနဲ့သဘောကျနေတယ်”
“အဲဒီတုန်းကပေါ့..ငါ့ကိုခွေးတစ်ကောင်လည်ပတ်ကြိုးပေးပြီး..ဆွဲခိုင်းသေးတယ်”
“ငယ်ငယ်တုန်းကခွေးကိုက်ခံထိပြီး..ခွေးရူးဆေး ၁၄ လုံးထိုးခဲ့တယ်”
“အဲ့အချိန်ထဲက..ငါခွေးကိုမုန်းနေတာ..ဒီနေ့ထိ..ဒီသောက်လံဘား...ဒုက္ခပေးသွားတယ်”
“မင်းကိုဆွဲခိုင်းတဲ့ခွေးက..စူရှီ..ခွေးပုလေးပါကွာ..တစ်ထွာလောက်ဘဲမြင့်တဲ့ခွေးပု”
“ဘယ်ခွေးဖြစ်ဖြစ်ကွာ..ငါကခွေးဆိုရင်အားလုံးမုန်းတယ်...”
လူတိုင်းလူတိုင်းမှာအားနည်းချက်ကိုယ်စီရှိတယ်..
ဒီအားနည်းချက်ကိုမှ..စတာ..နောက်တာ..ကလုံးဝမကောင်းဘူး
ဒါပေမဲ့..လုပ်နေတာက..စူပါလံဘား..သူ့ကျတော့ဘယ်လိုပြောမလဲ..
လုပ်နေတာက..သူတို့ဆိုင်မှာ..
နေ..နေတာကသူတို့တိုင်းပြည်...
ကိုယ့်စာအုပ်က..အိုနေပြီ..
ဒီစူပါတွေက..ကျနော်တို့လုပ်ခတွေကိုမှတ်ချက်ပေးလို့ရတယ်...
ဆိုတော့...စူပါတွေကိုအလိုက်အထိုက်ပေါင်းနေရတယ်...
မချစ်ပေမဲ့လဲအောင့်ကာနမ်းလို့ဘဲပြောရမယ်...
အဲလောက်ထိ..မဆိုးသေးပါဘူး..အားလုံးအဆင်ပြေကြပါတယ်
ဒီလနားရက်..လျှောက်လည်ကြမယ်..ကျနော်တို့ချစ်တဲ့စူပါလံဘားနဲ့..
ကစားကွင်းတခုဆီဦးတည်ပြီးထွက်လာခဲ့ကြတယ်...
ကျနော်စိတ်ထဲမှာဘယ်မှမသွားချင်ပါ..ကိုယ့်အခန်းမှာဘဲနေ..နေချင်တယ်..
ဒါပေမဲ့..မရဘူး..လိုက်ခဲ့ရမယ်...ဆိုတော့လဲလိုက်ရတာပေါ့...
ကစားကွင်းထဲမှာ..သူ့အုပ်စုနဲ့သူ...ဆော့ကစားနေကြတယ်..
လမ်းလျှောက်ရင်း..ဟိုကြည့်ဒီကြည့်..လျှောက်သွားနေရာက
တနေရာမှာ..ရိုလာကိုစတာ..ကိုတွေ့တယ်...
ရိုလာကိုစတာ..ကိုကြည့်ရင်းကျနော်ချွေးပြန်လာတယ်..
အမြင့်ကြီး..မခင်နှင်းဆီကိုသတိရသွားတယ်...
အဲ့အချိန်မှာ..စူပါလံဘား..ကျနော့်လက်ကိုဆွဲပြီး..
“မောင်ဂျစ်..မင်းနဲ့ငါ..ရိုလာကိုစတာ..စီးရအောင်..”
ကျနော့်...အမြင့်ကြောက်တဲ့ရောဂါကိုဘယ်ကောင်ပါးစပ်ချောင်လိုက်ပြီလဲမသိ
ဒီစူပါလံဘားကိုငြင်းလို့လဲမကောင်းဘူး..မတတ်နိုင်ဘူး..
ကျနော်..ချွေးပြန်နေတာကြည့်ပြီး..စူပါလံဘားကျနော့်ကိုမေးတယ်...
“မောင်ဂျစ်..မင်းအဆင်ပြေလား..”
“စူပါ..ကျနော်ကြောက်တယ်..မစီးပါရစေနဲ့..”
ကျနော့်စိတ်ထဲကရှိတာ..အမှန်အတိုင်းဖွင့်ပြောလိုက်မိတယ်..
အဲဒီမှာပိုဆိုးသွားပြီ..ကျနော့်အားနည်းချက်သိသွားတဲ့ဒီသောက်လံဘား...
“မင်း..ဘာမှမကြောက်နဲ့..စီးလို့အရမ်းကောင်းတယ်”
“ငါတို့ဆီက..ရိုလာကိုစတာ..ကအရမ်းမိုက်တယ်..”
“မင်း...မဆင်းနဲ့..စီးဘူးတယ်ရှိအောင်စီးကြည့်လိုက်စမ်းပါ..”
စူပါလံဘား...ကျနော့်ကိုခြိမ်းခြောက်သလိုနဲ့..ကောင်းကောင်းဒုက္ခပေးပြီ..
ကိုယ်ကသူတို့ဆီမှာလာအလုပ်လုပ်နေတယ်...
သူတို့ကနိုင်ငံကြီးသားတွေ..ကျနော်တို့ကမျက်နှာငယ်တွေ...
နိုင်ချင်တာလဲပါမည်..နှိမ်ချင်တာလဲပါမည်..မတတ်နိုင်တော့ပါ
လက်မှတ်လဲဖြတ်ပြီးပြီ...ထိုင်ခုံပေါ်ဝင်ထိုင်လိုက်ပြီ..
ကျနော်မျက်လုံးပိတ်ပြီး..စိုရိမ်ထိပ်လန့်နေတာကြည့်ပြီး
လံဘား....တဟားဟားအော်ရီနေတယ်
ခွေးမသားလံဘား...မင်းရီထားပေါ့ကွာ...
‘ဝေါ ‘ကနဲစထွက်တာနဲ့ကြောက်လန့်နေတဲ့ကျနော်၊အသံကုန်အော်ဟစ်နေမိပါတယ်..
ကျနော့်အဖြစ်ကိုကြည့်ပြီး..လံဘားရီလိုက်တာ..
ကြောက်လန့်နေတဲ့ကျနော်..မရှက်နိုင်ပါ..အော်ဟစ်နေတဲ့အသံမရပ်..
ကျနော့်အဖြစ်ကိုကြည့်ပြီး..စူပါလဲအော်ရီနေတယ်...
ဘုရား..ဘုရား..မြန်မြန်ပြီးပါတော့..ရိုလာကိုစတာ...
လူတကိုယ်လုံးချွေးတွေလဲရွဲ..အသံလဲဝင်တော့မယ်..
ဘေးကလံဘား...ရီသံလဲ..မရပ်သေးဘူး...
‘ ကျွီ ‘ကနဲရပ်သွားတဲ့ဘရိတ်သံကြားမှကျနော်..ဟင်း..ချနိုင်တယ်
ဘေးကစူပါလံဘားဆီကအသံမကြားတော့ပါ...
လှည့်ကြည့်လိုက်တော့..သူ့ပါးစပ်..နားရွက်တက်ချိတ်မတတ်..ပြဲနေတယ်..
သို့သော်..အသံကမထွက်..အသံတိတ်ရီနေသလိုမျိုး..
“စူပါ..ရောက်ပြီ..ဆင်းရအောင်..”
လံဘား...မျက်လုံးကြောင်ကြောင်၊ယောင်တောင်ပေါင်တောင်နဲ့ထလိုက်တဲ့အခိုက်
နှာခေါင်းထဲဆိုးဝါးလှတဲ့အနံ့ဆိုးတစ်ခုတိုးဝင်လာပါတယ်..
စူပါလံဘားကိုသေချာကြည့်လိုက်တော့...
ရှူရှူတွေထွက်ကျပြီးဘောင်းဘီတထည်လုံးရွှဲရွှဲ..စိုနေပါရောလား.....
ဓါတ်ပုံကိုအင်တာနက်ထဲမှယူသုံးထားပါသည်။
#ကိုဂျစ်
#စရိုက်မတူတဲ့လူ
Comments
Post a Comment